რუჯის თემა განსაკუთრებით აქტუალურია ზაფხულის პერიოდში: ზოგი სოლარიუმს მიმართავს, ზოგი ავტორუჯს, ზოგი მზეს ეფიცხება. ყველას ერთი მიზანი ამოძრავებს: კანმა მიიღოს მუქი ფერი. თუმცა არსებობენ რუჯის მიყვარულები, რომლებიც არასდროს კმაყოფილდებიან ნამზეურის ფერით და აქვთ პათოლოგიური დამოკიდებულება გარუჯვის მიმართ.

ტანორექსია – ამ ტერმინით აღინიშნება გარუჯვის მიმართ გადაჭარბებული “სიყვარული”. ტანორექსიას განიხილავენ ისეთივე სერიოზულ პრობლემად, როგორიცაა ნარკოტიკების მოხმარება. ამ მიდრეკლების ერთ-ერთი გამომწვევი მიზეზი შესაძლოა იყოს ის, რომ ულტრაიისფერი სხივები იწვევს ენდორფინის (ბედნიერების ჰორმონის, იგივე ბუნებრივი “ნარკოტიკის”) გამომუშავებას.

ტანორექსიის სიმპტომები ადვილადაა ამოსაცნობი: თუ შენ კვირაში 3-ზე მეტჯერ ირუჯები და ფიქრობ, რომ შენი კანის ფერი არ არის საკმარისად მუქი, ხშირად განიცდი ფრუსტრაციას კანის ფერის გამო, ფიქრობ, რომ გარუჯული უფრო მიმზიდველი ხარ, დიდი შანსია ტანორექსიკი იყო.

ტანორექსია ზრდის კანის კიბოს საშიშროებას. განსაკუთრებით სარისკოა რუჯით გატაცება თეთრი ფერის კანის მქონე ადამიანებისთვის, რომლებიც მზეზე ადვილად იწვებიან და წითლდებიან (ხშირ შემთხვევაში ქერები, წითურები).

ასევე, ულტრაიისფერი სხივები იწვევენ კანის ნაადრევ დაბერებასა და გამოშრობას, აზიანებენ მხედველობას.

ტანორექსიკებმა  უნდა გააცნობიერონ:

1. რომ ზედმეტი რუჯი სულაც არ უხდებათ და ამით უფრო მიმზიდველები არ ხდებიან,

2. ის საშიშროებები, რომლებსაც ულტრაიისფერი სხივები იწვევს.

უნდა გახსოვდეს, რომ გარიჯვისას აუცილებელია დაიცვა უსაფრთხოების შემდეგი ნორმები:

  • მზეზე ან სოლარიუმში გარუჯვამდე ნახევარი საათით ადრე წაისვი მზისგან დამცავი კრემი
  • სოლარიუმში კი აუცილებლად გაიკეთეთ სათვალე
  • მზეზე გასარუჯად აირჩიეთ დილა ან საღამო