Home თავის მოვლა

ბუნებრივია, რომ ქალების უმეტესობას თავისი სხეულის ერთი კონკრეტული ადგილი დანარჩენებზე მეტად არ მოსწონს, ან დიეტის თუ ვარჯიშის დროს იმ ერთ მონაკვეთზე უფრო ძნელად იკლებს წონას, ვიდრე მთელ სხეულზე. ჩემი ასეთი “პრობლემური” ადგილი თეძოებია.

ნატუროპათი მაქს ტომლინსონი თავის ახალ წიგნში “დაუმიზნე შენს პრობლემურ ადგილებს” აცხადებს, რომ მთავარია გაიგო მიზეზი, თუ რატომ მოიმატე ამ კონკრეტულ ადგილას და მისი გახდომა უკვე პრობლემა აღარ იქნება.

რატომ წარმოიქმენება პრობლემური ადგილები?

ტომლინსონის თქმით, პრობლემის მთავარი საწყისი ჰორმონული დისბალანსია. ადამიანის სხეულში ჰორმონები უამრავ პროცესს არეგულირებს, იმის ჩათვლით თუ სად და როგორ ვიმარაგებთ ცხიმებს. თუკი ჰორმონები ოდნავ მაინც ირევა, შეიძლება მოულოდნელად წონაშიც მოვიმატოთ. დისბალანსის ძირითადი გამომწვევი მიზეზი კი როგორც წესი, არასწორი კვება, სტრესი, გარემოს დაბინძურება და ფიზიკური აქტივობის არარსებობაა.

როგორ მოვაგვაროთ?

ტომლინსონი აცხადებს, რომ სხეულის ყოველ კონკრეტულ მონაკვეთში ცხიმების დაგროვება ამა თუ იმ ჰორმონის აქტიურობის ან პირიქით, არააქტიურობის ბრალია. თუმცა ის ასევე გვუბნება, რომ ჰორმონების “უსაქციელობის” მოგვარება და მათი აქტივობის დაბალანსება თავადაც შეგვიძლია.

კვება

მაქს ტომლინსონი გვირჩევს, უპირველეს ყოვლისა, დავიცვათ ნაკლები ცხიმის შემცველი “ხმელთაშუაზღვის” დიეტა, რაც გულისხმობს ბევრი ხილის და ბოსტნეულის მიღებას. ასევე უნდა მივიღოთ კვერცხი, თევზი, თხილეული, ზეთისხილის ზეთი, ნაკლებად ცხიმიანი რძის პროდუქტები და უცხიმო ხორცი. მაქსიმალურად უნდა შევზღუდოთ ალკოჰოლი და რაციონიდან ამოვიღოთ ე.წ. “junk-food”. მულტივიტამინის და თევზის ზეთის თითო კაფსულა ყოველდღე კი უზრუნველყოფს სასიცოცხლო მნიშვნელობის ყველა ნივთიერების მიღებას.

ამის გარდა, შეგვიძლია ყოველ პრობლემურ ადგილს კონკრეტული, მისთვის განკუთვნილი სტრატეგიით მივუდგეთ:

რომელია შენი პრობლემური ადგილი?

View Results

Loading ... Loading ...

1. მოშვებული მუცელი

msuqani muceli

რატომ ხდება?

მუცლის გარშემო დაგროვილი ცხიმები თირკმელზედა ჯირკვლის არასწორ ფუნქციაზე მიუთითებს. ეს ჯირკვალი სტრესის ჰორმონს – კორტიზოლს გამოყოფს. როგორც წესი, დიდი მუცელი ხანგრძლივი სტრესის შედეგია, რის გამოც კორტიზოლის დონე სხეულში მუდამ მაღალია, ეს კი თავის მხრივ ინსულინის ჭარბ გამომუშავებას იწვევს და სხეულს აიძულებს ცხიმები მუცლის მიდამოებში შეინახოს.

გადაწყვეტილება

მთავარია მოდუნდე – ნებისმიერი ქმედება, რაც სტრესის დონეს შეამცირებს, ამ პრობლემის მოგვარებაშიც დაგეხმარება.

დიეტა

მთავარი მიზეზი ჭარბი შაქარია – განსაკუთრებით ალკოჰოლში და თეთრ ნახშირწყლებში. გლუკოზის დასარეგულირებლად დაბალი გლიკემიური ინდექსის მქონე საკვები უნდა მიირთვა – ბოსტნეული, თევზი, პარკოსნები და ხორცი.

დაივიწყე შაქარი, ალკოჰოლი, ყავა, თეთრი ბრინჯი და ცომეული.

ვარჯიში

აქტიური ვარჯიში სტრესს ამცირებს, თუმცა შეგიძლია კიდევ უფრო დამამშვიდებელი ეფექტის მქონე ფიზიკური აქტივობა აირჩიო, მაგალითად იოგა.

2. პრობლემური ზურგი

msuqni zurgi

რატომ ხდება?

როგორც წესი, ზურგზე არსებული ცხიმის “ჯიბეები” ფარისებრი ჯირკვლის დისფუნქციასთანაა დაკავშირებული. ეს ჯირკვალი გამოიმუშავებს ჰორმონ თიროქსინს, რომელიც აკონტროლებს ცხიმების დაწვის ტემპს. თუ ფარისებრი ჯირკვალი არასაკმარისად აქტიურია, ამან შეიძლება გამოიწვიოს ზურგზე ცხიმების დაგროვება, წონაში მომატება, ენერგიის სიმცირე და უხასიათობა.

გადაწყვეტილება

სტრესის დონის კონტროლი და სწორი კვება თიროქსინის გამოყოფას დაარეგულირებს.

დიეტა

ზოგიერთი ბოსტნეული ხელს უშლის თიროქსინის გამოყოფას, ამიტომ აჯობებს შეამცირო ბროკოლის, კომბოსტოების, ატმის, სოიოს მოხმარება. თუკი ამ პროდუქტებს კარგად მოხარშავთ, მათი მიღება შეიძლება. ასევე მნიშვნელოვანია იოდის შემცველი პროდუქტების მიღება – ზღვის წყალმცენარეები, თევზეული, მოლუსკები, ნატურალური იოგურტი და მუქ-მწვანე ფოთლოვანი ბოსტნეული (მაგალითად, ისპანახი).

ვარჯიში

ზომიერი ვარჯიში ამცირებს ცხიმის დონეს და ხელს უწყობს ცხიმის გადამუშავებას. მთავარია იმოძრავო ისე, რომ არ გადაიღალო და გამოიფიტო. სცადე რამე სახალისო, მაგალითად ცეკვის გაკვეთილები ან ზუმბა.

3. ფუმფულა წელი

fumfula weli

რატომ ხდება?

ეს მდგომარეობა ცნობილია, როგორც ინსულინ-რეზისტენტობა და ხდება მაშინ, როდესაც სხეულის უჯრედები სწორად არ რეაგირებენ ინსულინზე და სისხლში გადააქვთ ჭარბი გლუკოზა. ამის გამო ცხიმის დაგროვება სწორედ წელის გარშემო იწყება.

გადაწყვეტილება

სწორი საკვები დაარეგულირებს ინსულინის და გლუკოზის დონეს.

დიეტა

სისხლში გლუკოზის დონის დასარეგულირებლად თეთრი ნახშირწყლებიდან გადაერთე მარცვლეულ პროდუქტებზე. მიირთვი სახლში მომზადებული საკვები, რაციონში შეიტანე ხილი, ბოსტნეული და თევზი. თავი მოარიდე ალკოჰოლს და შაქრიან პროდუქტებს. ასევე ფრთხილად იყავი ე.წ. “ჯანსაღ” მზა დილის საუზმეებთან, რომლებიც შაქარს შეიცავს. ანტიოქსიდანტებით გაჯერებული საკვები თავისუფალი რადიკალების დამაზიანებელი მოქმედების პრევენციას ახდენს და “ებრძვის” ინსულინრეზისტენტობის ჩამოყალიბებას. ასეთებია – მწვანილი, სანელებლები, ციტრუსები, თხილეული, კენკროვნები, ბროკოლი და მწვანე ჩაი.

ვარჯიში

კარდიო – ნებისმიერი ვარჯიში, რომელიც გულისცემის სიხშირეს ზრდის – ძალიან მნიშვნელოვანია ამ პრობლემური ადგილების ასალაგებლად. დღეში 10 წუთიანი სირბილი ან სწრაფი სიარულიც კი დიდ გავლენას მოახდენს შენს ფორმებზე. როგორც კი შესაძლებლობა გექნება, დატვირთე სხეული – მაგალითად ლიფტის მაგივრად კიბით ადი.

4. ჩამოშვებული მკლავები

chamoshvebuli-mklavebi

რატომ ხდება?

ჩამოშვებული მკლავები როგორც წესი ტესტოსტერონის სიმცირეზე მეტყველებს და ძირითადად ასოცირებულია შუახნის ასაკთან. ეს ჰორმონი ქალებსაც გამოეყოფათ და აუცილებელია კუნთების სიმკვრივის შესანარჩუნებლად.

გადაწყვეტილება

ტესტოსტერონის დონის აღდგენა და შესაბამისი ვარჯიშები უნდა დაგეხმაროს მკლავების ძველი ფორმის დაბრუნებაში.

დიეტა

ჭარბი შაქარი და თეთრი ნახშირწყლები (ცომეული, ნამცხვრები…) ტესტოსტერონის დონის შემცირებას იწვევენ, ამიტომ მსგავსი საკვები ნელ-ნელა უნდა შეზღუდო. კარგი იქნება მიიღო “კეთილი” ცხიმები, რომლებიც გვხვდება ავოკადოში, ორაგულში და თხილეულ-მარცვლეულში, ამასთან ერთად თავი აარიდო ცხიმებს, რომლებიც გვხვდება წითელ ხორცში და ცხიმიან რძის პროდუქტებში.

ვარჯიში

ფიზიკური დატვირთვის არ არსებობა ტესტოსტერონის დონეს ამცირებს, მსუბუქი დატვირთვა – ისეთი, რომელიც კუნთების დასატვირთად სხეულის წონას იყენებს – აუცილებლად გაზრდის მას. ასეთი ვარჯიშებია ძუნძული, აქტიური სიარული და… მეტი სექსი. სიმძიმეების აწევაც დადებითად იმოქმედებს ხელის კუნთების ტონუსზე.

5. დიდი თეძოები და უკანალი

saddlebags

რატომ ხდება?

თუ ამ ადგილებში მეტად იმატებ და ვერ ახერხებ დაკლებას, შენს ორგანიზმში სავარაუდოდ ჭარბი ესტროგენის გამომუშავება ხდება. ხშირად ეს შეიძლება კონტრაცეპტულმა აბებმაც გამოიწვიოს.

გადაწყვეტილება

ჩვენი მიზანია ესტროგენის დონის კლება ბუნებრივი გზით მოვახდინოთ, ეს კი ცხოვრების წესის შეცვლით შეიძლება მოხერხდეს.

დიეტა

მიირთვი მეტი ხილი, ბოსტნეული და მარცვლეული, რადგან უჯრედისი, რომლებსაც ეს პროდუქტები შეიცავენ ხელს უწყობს ჭარბი ესტროგენის გამოდევნას.

შეზღუდე ალკოჰოლი, ტკივილგამაყუჩებლები და გადამუშავებული ხორცი, რადგან ისინი სავსეა ისეთი ქიმიური ნივთიერებებით, რომლებიც ღვიძლს ხელს უშლის ესტროგენის დონის რეგულირებაში. ნატურალური იოგურტის მიღება შესაძლოა ასევე დაეხმაროს საჭმლის მომნელებელ სისტემას ჭარბი ესტროგენის გამოდევნაში.

ვარჯიში

იდეალურ შემთხვევაში რეკომენდებულია დღეში 10-წუთიანი სეირნობა ან სირბილი, რადგან ეს ყველაზე ბუნებრივი გზაა გულისცემის ასაჩქარებლად. ველოსიპედით სეირნობა, სიმძიმეების აწევა და კროს-ტრენინგიც კარგი საშუალებაა, თუმცა სიფრთხილის გამოჩენაა საჭირო, რათა სხეული სტრესში არ ჩავარდეს და კიდევ უფრო მეტი ცხიმის დაგროვება არ დაიწყოს.

4 კომენტარი to this post

შენ რას იტყვი?