დილაობით გაღვიძება ყველას გვიჭრის. ალაბთ შენც ყოველ დილით სვამ ყავას მხოლოდ იმისთვის, რომ გამოფხიზლდე. კარგი სიახლე ის არის, რომ დილაობით ენერგიის მოსაკრებად სულაც არ არის საჭირო ბუნებით “ტოროლა” იყო. დილაობით შენი თვითშეგრძნება და უენერგიობა მეტწილად განპირობებულია შენივე ქცევით.

გაეცანი ამ ცამეტ რჩევას რომლის დახმარებითაც შენი დილა უფრო ენერგიული, ხალისიანი და ნაკლებად სტრესული გახდება!

საღამოობით:

გამოიძინე

ამერიკულმა ძილის ეროვნულმა ფონდმა (ჰო, თურმე ასეთიც არსებობს!) ძილის შესახებ ჩატარებული 2011 წლის გამოკითხვების შედეგად დაადგინა, რომ  ადამიანების 63% სამუშაო კვირის განმავლობაში საკმარისად გამოძინებას ვერ ახერხებს.

მოზრდილებისთვის ზოგადად რეკომენდირებულია 7–9 საათის ძილი, თუმცა ყველა არ ჯდება ამ წესში. ზოგ ადამიანს მეტი ძილი სჭირდება, ზოგს კი ნაკლები (თუმცა არა ნაკლებ 6 საათისა, თორემ ქრონიკული უძილობაა მოსალოდნელი). იმ მაგიური ციფრის გასაგებად, რომელიც შენთვის საჭირო ძილის საათების რაოდენობას უდრის, შენსავე სხეულს მიენდე. დაწექი მაშინ როცა ძილი მოგერევა და მაღვიძარას გარეშე გაიღვიძე.

ჭამე ცოტა

შენს ძილზე ისიც კი გავლენას ახდენს თუ რას მიირთმევ ვახშმად. გვიან ღამით ჭამა კუჭს აიძულებს საჭმლის გადამუშავებას შეუდგეს, რაც ართულებს სხეულის მოდუნებას. თუ შებერილობას და მოუნელებლობას აქვს ადგილი, ლოგინში დიდხანს ბორგვა და წრიალიც არ აგცდება. უფრო მეტიც, დიდი პორციების მირთმევა, ზრდის შანსს რომ ღამით ბუნებრივმა მოთხოვნილებებმა გაგაღვიძოს.

თუ გვიან ჭამამ აუცილებლად მოგიწია, შეამცირე პორცია და საკვებიც მსუბუქი შეარჩიე.

არ დალიო ძილის წინ

მიუხედავად იმისა, რომ ალკოჰოლი თითქოს გადუნებს, საბოლოოდ იგი მაინც შენს ძილს უშლის ხელს. არა მხოლოდ შარდვის მომატებას განაპირობებს (რაც ნიშნავს, რომ ღამის განმავლობაში ერთხელ მაინც მოგიწევს ტუალეტში გასვლა), არამედ ბოლო ჭიქის დალევიდან სამი–ოთხი საათის შემდეგ ტვინი გამოფხიზლებას იწყებს.

თუ მაინცდამაინც აუცილებლობაა, ბოლო ჭიქა ძილამდე მინიმუმ 4 საათით ადრე შესვი.

დაიცავი ძილის რეგულარული განრიგი

აღმოჩნდა, რომ უფროსებსაც ისეთივე ძილის განრიგი ესაჭიროებათ, როგორც ახალ დაბადებულ ბავშვებს. არეული ძილის რეჟიმმა შეიძლება ბიორიტმი დაგირღვიოს, რაც ძილის ხარისხს გაგიფუჭებს. სცადე ყოველ დღე ერთსა და იმავე დროს დაიძინო და გაიღვიძო, 30–60 წუთის გადაცილებას არა უშავს. ამით სხეულს მიაჩვევ, რომ დილაობით ერთი და იგივე დროს გამოფხიზლდეს და ენერგიაზე მოვიდეს.

იძინე “გამოქვაბულში”

ექიმები ამბობენ, რომ სინათლეში ძილმა შეიძლება სხეულის შინაგანი ციკლები დარღვიოს. როცა დაწვები, ჩააქრე ყველა ნათურა თუ მაგიდის ლამპა, არ დატოვო ჩართული კომპიუტერის ეკრანი, მოიშორე სინათლის ყოველგვარი წყარო, თვით ციფრული საათიც კი (მაგალითად, რამე ნაჭერი გადააფარე).

დილაობით:

დალიე წყალი

წარმოიდგინე, როცა გძინავს მთელ ღამეს სითხის მიუღებლად ატარებ, რაც ნიშნავს, რომ სხეული დეჰიდრაციას განიცდის და ამან შეიძლება დაღლილობის შეგრძნება გამოიწვიოს.

როგორც კი თვალს გაახელ, ერთი ჭიქა სითხე მიიღე. ეს ცირკულაციას განაახლებს და ენერგიას მოგცემს. ჩვეულებრივი სუფთა წყალი ამისთვის მშვენერი იქნება, ან სცადე ასეთი მატონიზირებელი ნარევი:

  • 1/8 ჩაის კოვზი წიწაკა
  • 1 სუფრის კოვზი დაფქული ჯანჯაფილი
  • 2 გამოწურული ლიმონი
  • 1 ჭიქა წყალი.
  • სიტკბოსთვის ცოტაოდენი სტევია დაუმატე.

აუცილებლად ისაუზმე

ამბობენ, საუზმე ერთადერთი საჭმელია, რომელიც საერთოდ უნდა მიიღოო. :) ამ დროს ტვინს მთელი დღის სამყოფი გლუკოზა მიეწოდება. საუზმე ასევე დაარეგულირებს სისხლში შაქრის დონეს; თუ შაქრის დონე დაბალია, თავს გამოფიტულად იგრძნობ.

რა სახის საჭმელი უნდა მიირთვა საუზმეზე, ეს უკვე შენს სხეულზეა დამოკიდებული. ზოგი ცილებით მდიდარ მენიუს არჩევს (კვერცხი, ხორცი, რძის პროდუქტები), ზოგი კი ნახშირწყლებით იმატებს ძალას (შვრია). ჩაატარე ცდები და ნახავ, რომელი საუზმე გაკმაყოფილებს.

მიეფიცხე მზეს

ლოგინიდან წამოდგომის შემდეგ ერთ–ერთი პირველი ქმედება გარეთ გასვლა და 15–30 წუთის განმავლობაში ბუნებრივი სინათლის “შეწოვა” უნდა იყოს. მზის სინათლე მოქმედებს თავის ტვინში მდებარე ეპიფიზზე (გირჩისებრი ჯირკვალი), რის გამოც მელატონინის გამოყოფა მცირდება. მელატონინის დონის დავარდნა გაფხიზლებს. სამწუხაროდ, ოთახის განათება საკმარისად ძლიერი არ არის მსგავსი შედეგის მისაღებად. თუ დილით გაიღვიძებ და გარეთ ცუდი ამინდია ან სიბნელეა, დილის ტუალეტის, გაზეთის კითხვის ან საუზმობის დროს ძლიერი ხელოვნური განათება გამოიყენე.

თავი შეაფარე ბუნებას

ის ადამიანები, ვინც დღეში მინიმუმ 20 წუთს ატარებენ სუფთა ჰაერზე, ფიზიკურად და მენტალურად  20%–ით უფრო ენერგიულად გრძნობენ თავს, ვიდრე ისინი, ვინც მთელი დღე ოთხ კედელს შორის სხედან. მკვლევარები ვარაუდობენ, რომ ბუნებაში ყოფნა სიცოცხლის უნარიანობას გვმატებს. ამიტომ გაისეირნე, თუნდაც 10 წუთით.

დაიწყე მედიტაცია

მიუხედავად იმისა, რომ მედიტაციის დროს თვალები დახუჭული გაქვს და გაუნძრევლად ზიხარ, ტვინი მაინც აქტიურდება. იგი სისხლის მიმოქცევის გაუმჯობესების ერთ–ერთი კარგი საშუალებაა. 15 წუთიანი მედიტაციაც საკმარისი იქნება და თუ შეძლებ, ფანჯრის წინ დაჯექი, საიდანაც მზის შუქი შემოდის.

ამოძრავდი

ფიზიკური აქტივობა სისხლის მიმოქცევას აუმჯობესებს, რაც მომენტალურად გავსებს ენერგიით. თუმცა არ გეგონოს, რომ კილომეტრების გარბენაა საჭირო. ცოტაოდენი აქტიურობაც კი ჩაგეთვლება, როგორიცაა მებაღეობა, ძაღლის გასეირნება ან იოგა. თუ გარეთ გახვალ, ზემოთ ნახსენებ სასარგებლო მზის შუქსაც იხილავ და ბუნების წიაღითაც დატკბები.

მთელი დღის განმავლობაში:

შეამცირე კოფეინი

მიუხედავად იმისა რომ ფინჯანი ყავა დილით პირველი რამაა რაც გაფხიზლებს, ხოლო ჩაი შუადღის მოდუნებისგან გიხსნის, შესაძლოა კოფეინის სიყვარულმა არც ისე კარგი გავლენა მოახდინოს შენს ჯანსაღ ბიორიტმებზე.

კოფეინი ადრენალინის გამომუშავების ბუნებრივი სტიმულატორია. დღის განმავლობაში 200–300 მილიგრამზე ან 2–3 ფინჯან ყავაზე მეტს ნუ მიიღებ. დასაძინებლად დაწოლამდე 6 საათის განმავლობაში საერთოდ არ მიიღო არანაირი კოფეინის შემცველი პროდუქტი.

შეამცირე ენერჯაიზერი სასმელები

მართალია სტიმულატორებით გაჯერებული სასმელები უეცარ ენერგიას გაძლევს, მაგრამ არ მოტყუვდე: ასეთი სასმელების უმეტესობა იმდენად ბევრ სტიმულატორს შეიცას, რომ შეიძლება სისხლში შაქრის შემცველობის დაწევა და შესაბამისად დაღლილობის/ძილიანობის შეგრძნება გამოიწვიოს. ხანგრძლივად და ზედმეტად სტიმულირებული ნერვული სისტემა დროთა განმავლობაში თირკმელზედა ჯირკვლის “გადაწვას” გამოიწვევს. თუ ეს მოხდება, დღე–ღამის განმავლობაში დაღლილობის შეგრძნება დაგტანჯავს.

თუ მაინც და მაინც სტიმულატორი გჭიდება, მიიღე ერთი ფინჯანი ყავა ან უფრო უკეთესი, მწვანე ჩაი, რომელიც ნაკლებ კოფეინს და მეტ ანტიოქსიდანტებს შეიცავს.