გაგიგიათ კომპანია “დეშელი“-ს (DeSheli) შესახებ? თუ არა, მაშინ ეს სტატია აუცილებლად ბოლომდე წაიკითხეთ, რათა უნებლიედ თაღლითობის მსხვერპლი არ გახდეთ. ფეისბუქზე, ერთ-ერთ დახურულ ჯგუფში, სადაც რამდენიმე გოგონა ვართ გაწევრიანებული, ერთ-ერთმა, 23 წლის ნინომ, ასეთი ამბავი დაწერა:

“ძალიან უცნაური ამბავი მოხდა ცოტა ხნის წინ. დედაჩემი გახდა თაღლითობის მსხვერპლი. თუ გაიგებთ, რომ ვინმე თქვენს ნაცნობს ურეკავს ვინმე კომპანია “დეშელიდან”, გააფრთხილეთ, არ მივიდეს უფასო კონსულტაციაზე. დედაჩემი მივიდა და არ ვიცი რისი გამოყენებით, მაგრამ ააღებინეს სესხი. ეჭვობს, რომ კრემებში, რომლებიც უფასოდ, სასინჯად წაუსვეს, ნარკოტიკული ნივთიერებები იყო. ინტერნეტში დავძებნე და უამრავი დაზარალებული არსებობს რუსეთში, სხვა ქვეყნებშიც. ძალიან გაბრაზებული ვარ და არ ვიცი რა ვქნა. ცხოვრებაში მაკიაჟი არ მოუხმარია და ყველაზე მეტად სესხის ეშინია, მაგრამ აიღო სესხი მაკიაჟის გამო: 2800 ლარი. სულ 10 კრემია და ჯამში მაგდენი გამოდის. მართლა არ ვიცი, როგორ დაითანხმეს ეგეთ რამეზე. ცხოვრებაში არაფერი წაუსვამს სახეზე. თან არც ვიცი, მაგ ფასის შესაბამისი პროდუქცია არის თუ არა. რაც უნდა იყოს, სესხის აღება მაკიაჟის გამო? ეს არის ისეთი აბსურდი, რომ შოკში ჩავვარდი, რომ გავიგე. ეს არის ქალი, რომელიც მარშუტკით არ დადის, რადგან მარშუტკები ეძვირება და ფეხით გადაადგილდება ხოლმე შორ მანძილზე ფულის დაზოგვის მიზნით. იმ კოსმეტიკას მაინც ვერ გამოიყენებს. როგორც წავიკითხე, ძალიან, ძალიან აქტიურ ნივთიერებებს შეიცავს, რომელიც მაშინვე, პროცედურაზევე გაძლევს შედეგს, რომ ჩქარა იმოქმედოს გაყიდვის გადაწყვეტილებაზე, მაგრამ თუ ხანგრძლივად გამოიყენებ, საშინელ ალერგიას იძლევა. ათასი რაღაც წავიკითხე. არც დედაჩემია მაინცდამაინც გულუბრყვილო, მაგრამ გაება. პრინციპი ასეთია: ვიღაცას მიიყვანენ, სთხოვენ, დატოვოს რამდენიმე ნომერი, მერე მათ ურეკავენ და ასე შემდეგ. ზოგჯერ სხვებსაც ურეკავენ და ატყუებენ, რომ მეგობარმა უფასო მასაჟზე ჩაწერა. სავარაუდოდ, ის ბაზები იყიდეს, რომლითაც გვსპამავენ ხოლმე მობილურზე ამბოლები და ტექნობუმები. მანამდე არ გეშვებიან, სანამ არ მიხვალ. თან პასპორტის და პირადობის გარეშე ვერ მიხვალ. სულ გაფრთხილებენ ტელეფონშივე, რომ თან გქონდეს და რომ მიდიხარ, გართმევენ და მიაქვთ, რომ ჩქარა დაიწყონ მონაცემების შევსება. ანუ თუ არ მიიტან, არც გაგიკეთებენ პროცედურას და ვერაფერსაც ვერ გაარკვევ. რაღაც ჩანაწერი ვნახე, სადაც ჩანს, როგორ ესაუბრებიან კლიენტს. ძალიან ბევრჯერ იმეორებენ ერთსა და იმავეს, სიტყვას არ გათქმევინებენ და თვითონ კოსმეტიკაც მოქმედებს მგონი. რა თქმა უნდა, ვერ დააბრალებ რამეს, მაგრამ ყველა პირობას გიქმნიან, რომ უარი ვერ უთხრა. მერე მხოლოდ ნახევარ სახეზე გისვამენ ამ კრემებს. სესხის სრულ თანხას არც გეუბნებიან. მხოლოდ იმას ამბობენ, რომ თვეში 100 ლარს გადაიხდი. დედაჩემს რცხვენია, რომ მოტყუვდა და მთხოვა, არ დაწეროო, მაგრამ საბოლოოდ მაინც ვერ მოვითმინე. ორი წელი უნდა იხადოს სესხი მაგ აფერისტების გამო. უკვე 2 ადამიანი ვიცი დედაჩემის გარდა, ვისაც იგივე შეემთხვა. როგორც კი გამოდიან, მაშინვე ხვდებიან რაც მოხდა, მაგრამ უკვე ყველაფერზე აქვთ მოწერილი ხელი. მისვლა მინდა, გასარკვევად, და მართლა მეშინია, მეც რამე ეგეთში არ გამხვიონ. თან ყველა ქართული ბანკი იქ ზის. დედაჩემს თიბისიმ მისცა სესხი. გრატოში სხედან. სავაჭრო ცენტრში. ყველაფერი ძალიან საეჭვოა. იურისტიც ჰყავთ, რომელიც გეკითხება რაღაცებს. უცნაური არაა ეს?”

ნინოს ნათქვამმა დიდი აჟიოტაჟი გამოიწვია. ალბათ ცოტათი დაუჯერებლადაც მოგვეჩვენებოდა, დანარჩენებსაც რომ არ დაეწყოთ საკუთარი ან გარშემომყოფების გამოცდილების გახსენება. desheli_косметика

მარი, 26 წლის:

“მე თმას სადაც ვიკეთებ, იმ სალონში შემხვდა ერთი გოგო და ავიღეო, კარგიაო, უფასო კოსმეტიკური მომსახურება მოყვებაო და რა კრემებიც იყიდა მთელი წელი უნდა მეყოსო. კმაყოფილი იყო. საინტერესო კიდევ, დეიდაჩემს დაურეკეს, ვიღაცამ ჩაგწერა უფასო მასაჟზეო. კიდევ ჩემი დის თანამშრომელმა გოგომაც ეგრე თქვა, უარი ვერ ვთქვიო და როგორ ახერხებენ? ალბათ თბილი მოპყრობით, კარგი გარემოთი და შიკით გახვევენ თავბრუს, მოგწონს და თანახმა ხარ”

მაიკო, 29 წლის:

“ვაიმე, ჩემი თანამშრომელი იყო მგონი მანდ. მერე მე მირეკავდნენ და ძლივს დავარწმუნე, რომ არ მინდოდა. ვიკითხე ჩემთან, ჩემ გარდა კიდევ რამდენიმეს დაურეკეს იგივენაირად, რამდენჯერმე, ბოლოს საათები ურჩიეს. მარა ბავშვიანები არიან და არ წავიდნენ. ვინც იყო, ის იძახდა თურმე, იმდენი მელაპარაკნენ და ბოლოს ისე უხერხულად ვიყავი, ისედაც ბევრი ვალები რომ არ მქონოდა, ალბათ შევიძენდი იმ კრემებსო.”

სალომე, 31 წლის:

“ერთ-ერთ ჯგუფში წერდა ქალი, რომ იყო მანდ, ძალიან მაგრად მოემსახურნენ, მაგრად აბოლებდნენ, მაგრამ ვერ აიძულეს 3000-ის გადახდა. ჩემს უფროსსაც დაურეკეს რამდენჯერმე. აგრესიული მარკეტინგია და დაბოლება. ტელეფონზე რომ გეუბნებიან, თქვენმა მეგობარმა გაჩუქათ ეს პროცედურა უფასოდო, ტყუილია. ჩაეძია ჩემი უფროსი და სახელი არ უთხრეს და არც არავინ ეგულება მისი მეობრებიდან, ვინც ჩააწერინებდა სახელს და არ გააფრთხილებდა.”

ქეთი, 25 წლის:

“ახლა ველაპარაკე დედაჩემს და მოვუყევი ეს ამბავი, რომ მეთქი ესე და ესეა და ფრთხილად იყავი. მითხრა, რომ ორი დღეა, ვიღაც გოგო ურეკავს მაგ კომპანიიდან. რაც უფრო მეტს ვეუბნებით ამის შესახებ, მით უფრო მეტი გვეუბნება, რომ მასაც დაურეკეს. ჩვენი თანამშრომლის ახლობელს დაურეკეს და ისიც კი იცოდნენ, რომ რუსულ ენოვანია ის ქალი და რუსულად დაიწყეს ლაპარაკი. ჩემი მეგობრის დედამაც თქვა, დამირეკეს მაგ კომპანიიდან და ასე მითხრეს უფასო მასაჟზე ხარ ჩაწერილიო. მერე მკითხეს ალერგიული ხომ არ ხართ იმიტომ, რომ შეიძლება ალერგია მოგცესო და მაგიტომ აღარ წავედი, თორემ ვაპირებდიო…”

 ხატია, 36 წლის (8 თვის ორსული):

“უი, ახლა გამახსენდა, დამირეკეს 1 თვის წინ და შემომთავაზეს სახის ნიღაბი, მასაჟი და ა.შ. რომ ვუთხარი ორსულად ვარ-მეთქი, კარგი მაშინ, სხვა დროს შეგეხმიანებითო.”

ამ ისტორიის წაკითხვაზე ყველანი შოკში ჩავვარდით და ინტერნეტ-ძიებას მივმართეთ. ნიუს საიტები მოგვითხრობენ, რომ “დეშელის” საქმიანობა მთლიანად აგრესიულ მარკეტინგზეა დაფუძნებული. რუსეთში უამრავი უკმაყოფილო მომხმარებელი ჩივის. ისინი ეჭვობენ, რომ კომპანია კლიენტების დასარწმუნებლად ნეიროლინგვისტურ პროგრამირებას იყენებს. გარდა ამისა, არსებობს ეჭვი, რომ პროდუქციის ხარისხი მის ფასს მთლად არ შეესაბამება.

Google-ში იძებნება თემა თბილისის ფორუმზე, სადაც ეს კომპანია ასევე ნეგატიურ კონტექსტშია მოხსენიებული.

ჩვენ შევეცადეთ გაგვერკვია, ვინ დგას ამ კომპანიის უკან. ერთადერთი რისი გარკვევაც მოვახერხეთ არის ის, რომ კომპანიის დირექტორი და 30%-იანი წილის მფლობელი მარიამ კუბლაშვილია, რომელსაც ასევე საადვოკატო ბიურო აქვს დაარსებული თბილისში, დანარჩენი 70% ვინმე მიხაელ ლუბარსკის ეკუთვნის, რომელიც ისრაელის მოქალაქეა. ვცდილობდით მარიამ კუბლაშვილისთვის ჩამოგვერთმია ინტერვიუ, მაგრამ სამწუხაროდ ტელეფონს არ პასუხობს.

თუ თქვენ ან თქვენს ახლობლებს გქონიათ შეხება კომპანია “Desheli”-სთან გთხოვთ კომენტარებში გაგვიზიაროთ თქვენი გამოცდილება.

თქვენი აზრით, რამდენად გამართლებული და ეთიკურია ასეთი აგრესიული მეთოდების გამოყენება კოსმეტიკის გაყიდვებში?

განახლება:

რადგან ამდენი ადამიანი ითხოვს ერთმანეთთან დაკავშირებას, გადავწყვიტე Facebook-ზე ჯგუფი შემექმნა, სადაც შეგეძლებათ ერთმანეთისთვის ინფორმაციის სწრაფ რეჟიმში გაცვლა. ჯგუფს შეგიძლიათ შეუერთდეთ აქ: www.facebook.com/groups/909068615839947