თქვენი შეკითხვები და ისტორიები შეგიძლიათ გამოგზავნოთ ამ ფორმის მეშვეობით: მოგვწერეთ

w2

ისტორიები და ამბები,  რომელთა შესახებაც  ვწერთ, ჩვენს ერთგულ მკითხველს უბიძგებს საკუთარი ამბის მოყოლაზე. მათი სურვილი, მიიღონ რჩევა, მოყვნენ საკუთარი გულისნადები, უკვე წინსვლაა. ყველას ხომ არ შეუძლია საჯაროდ ისაუბროს საკუთარ პრობლემაზე.

მინდა გაგაცნოთ კიდევ ერთი ქალბატონი – 26 წლის მარიამი.  ჩვენი მიზანია, გავიზიაროთ თქვენი გასაჭირი და შეძლებისდაგვარად დაგაკვალიანოთ. სწორედ ამიტომ თავდაპირველად  წაიკითხეთ მარიამის წერილი სრულად  და შემდეგ გამოიტანეთ დასკვნები.

მკითხველის წერილი:

გამარჯობა. ძალიან მომეწონა თქვენი გვერდი, წავიკითხე “მკითხველის წერილები” და გადავწყვიტე ჩემი სიტუაციაც დავწერო, დიდი ხანია ვეძებდი მსგავს ვებ-გვერდს, სადაც ანონიმურობაც დაცული იქნებოდა და ჩემს “გასაჭირსაც” გულახდილად მოგიყვებით. დიდი მადლობა მინდა გადაგიხადოთ წინასწარ.

არვიცი როგორ დავიწყო, მსგავსი წერილი ჯერ არ წამიკითხავს, სადაც ისეთი სიტუაცია იქნებოდა აღწერილი, როგორშიც მე აღმოვჩნდი. ჩემს მდგომარეობას ვერავის დავაბრალებ და ჩემს თავსაც ალბათ ვერ ვაპატიებ თუ რაიმე ცუდი დამატყდება თავს. პირველ რიგში, მინდა გითხრათ, რომ მყავს საყვარელი მეუღლე და ერთი ბიჭუნა. წელიწადზე მეტია, რაც ინტერნეტის საშუალებით გავიცანი დასაოჯახებელი მამაკაცი. დავმეგობრდით, მაგრამ მალულად.

თავიდან რაღაც გასართობად მიმაჩნდა და მეგონა, ნებისმიერ დროს გავწყვეტდი მასთან კავშირს, მაგრამ ასე ადვილიც არ ყოფილა. საკმაოდ კარგად გავიცანით ერთმანეთის ხასიათი,საუკეთესო მეგობრებიც კი გავხდით, ყველაფერს ვუყვებოდით ერთმანეთს. უერთმანეთოდ ვერ ვძლებთ. შევუყვარდი. სულ ნანობს რატომ ცოტა ადრე არ გამიცნო. მარტო რომ ვიყო, მზადაა ჩემზეც კი იქორწინოს. მე არ ვიცი რას ვგრძნობ, ის კი ვიცი მის გარეშე არ შემიძლია. რამდენჯერმე გადავწყვიტეთ გაგვეწყვიტა კავშირი, რომ მე პრობლემები არ შემქმნოდა მეუღლესთან, მაგრამ არ გამოგვდის. საშინელი დეპრესია დამეწყო, რომ აღარ ვმესიჯობდით. მეგონა გავგიჟდებოდი, სულ ვტიროდი. არვიცი, რა ვქნა, რა გავაკეთო, როგორ გავწყვიტო მასთან კავშირი, როგორ შევძლო მისი დავიწყება.

თავს ვარიდებთ ჩვენს სიყვარულზე საუბარს, თითქოს რაღაცის გვეშინია. ძალიან მეშინია, რომ გამიგონ, რა მელის. მთელი ჩემი ცხოვრება შეიცვალა ვეღარაფერს ვაკეთებ, გულს ვეღარაფერს ვუდებ, ჩემი საქმეები გასაკეთებელი მრჩება, ძალიან ცუდად ვარ, გადმოცემაც არ შემიძლია რას ვგრძნობ. არავინ იცის ეს ამბავი, ან ვის ვეტყვი.

გთხოვთ, მირჩიეთ რამე, რაც დამეხმარება გამოსავლის პოვნაში. ძალიან ცუდად ვარ, მეტის ატანა მართლა აღარ შემიძლია.

— მარიამი, 26

ფსიქოლოგის პასუხი:

პირველ რიგში, მინდა აქცენტი გავაკეთო ამ წინადადებაზე „დავმეგობრდით, მაგრამ მალულად.“ — ანუ ეს ნიშნავს, რომ შენ თავიდანვე აცნობიერებდი ამ სიტუაციის მთელ სიმძიმეს და გააზრებულად არ გაასაჯაროე საკუთარი ურთიერთობა. მიჩნდება კითხვა, რატომ გაგიჩნდა სურვილი ვირტუალურად დაგეწყო ურთიერთობა სხვა ადამიანთან? იქნებ შენს ცხოვრებას რაღაც აკლდა, რასაც მეუღლე ვერ ავსებდა? იქნებ დაფიქრდე ამ კუთხითაც.

თავიდან რაღაც გასართობად მიმაჩნდა და მეგონა, ნებისმიერ დროს გავწყვეტდი მასთან კავშირს, მაგრამ ასე ადვილიც არ ყოფილა.

შენ დროთა განმავლობაში იმდენად დაუახლოვდი ამ ადამიანს, საკუთარი “მე” დაკარგე. ოდესმე თუ გიკითხავს საკუთარი თავისთვის, ვინ არის ეს ადამიანი შენთვის?  კონტაქტის გაწყვეტა ასე მარტივად არ ხდება. ყოველთვის დარწმუნებული უნდა იყო შენი გადაწყვეტილების სისწორეში.

თუ ფიქრობ, რომ კონტაქტის გაწყვეტა არის ერთადერთი გონივრული გამოსავალი,  გიყვარს შენი მეუღლე და აქ არაფერ შუაშია ის, თუ რას იფიქრებენ სხვები შენზე, მაშინ მიიღე მკაცრი და კონკრეტული გადაწყვეტილება. ეცადე გადაიტანო ყურადღება საკუთარ შვილზე. ის ყველაზე მარტივად დაგაძლევინებს სტრესს, რომელშიც იმყოფები.  მთავარი პრობლემა შენშია და ასევე შენს ხელთაა… დაფიქრდი კარგად, დააკვირდი ყველა მხარეს და მხოლოდ შემდგომ მიიღე გადაწყვეტილება, რომელსაც მკაცრად შეასრულებ. წარმატებებს გისურვებთ მთელი შემოქმედებითი გუნდი.

 

თქვენი შეკითხვები და ისტორიები შეგიძლიათ გამოგზავნოთ ამ ფორმის მეშვეობით: მოგვწერეთ