ხშირად მქონია შემთხვევა, როცა თანამოსაუბრე უცებ წყვეტს კამათს და ცხვირაბზუებული მეუბნება: „აუ, შენ ფემინისტი ხარ?“

რატომღაც სიტყვა „ფემინისტს“ ისეთი ნეგატიური ემოცია მოაქვთ ადამიანებში, რომ ძალაუნებურად ვიწყებ იმის მტკიცებას, რომ ავტომატურად ფემინისტი ხდება ყველა ის ადამიანი, ვისაც, მინიმუმ, ცოლების ცემა-ტყეპის ან მკვლელობის შემთხვევებზე თმები ყალყზე უდგება.

და საერთოდაც, ვინ არის ფემინისტი?

1. ის, ვინც წინააღმდეგია ქალის დაჩაგვრის.

2. ის, ვინც ფიქრობს, რომ ქალი არ უნდა მოკლან.

3. ის, ვინც ფიქრობს, რომ ქალი არ უნდა სცემონ.

4. ის, ვინც თვლის, რომ ქალმაც უნდა მისცეს ხმა არჩევნებში.

5. ის, ვინც ფიქრობს, რომ ჭკუას არ აქვს სქესი და ქალებშიც და მამაკაცებშიც მრავლად მოიპოვებიან სულელებიც და ჭკვიანებიც.

gender-equality

6. ის, ვინც ფიქრობს, რომ ლოგიკურად მოაზროვნე ადამიანი არაა აუცილებელი მამაკაცი იყოს.

7. ის, ვინც ფიქრობს, რომ ქალის ერთადერთი მოვალეობა გამრავლება არაა.

8. ის, ვინც უშვებს, რომ ქალიც შეიძლება მართავდეს ავტომობილს კაცზე უკეთ.

9. ის, ვინ ფიქრობს, რომ შვილს ორივე მშობლის ყურადღება თანაბრად სჭირდება.

10. ის, ვინც მიიჩნევს, რომ სელექციური აბორტი დაუშვებელია.

11. ის, ვინც ფიქრობს, რომ ადამიანს უფლება აქვს თავად გადაწყვიტოს, უმაღლესი განათლება სჭირდება თუ არა და ეს არ უნდა განისაზღვრებოდეს სქესით.

12. ის, ვინც ფიქრობს, რომ არ არსებობს პროფესიები, რომლებიც იყოფიან სქესის მიხედვით და წარმოუდგენია ქალი – პილოტად და მამაკაცი – მზარეულად.

13. ის, ვინც ფიქრობს, რომ სამსახურიდან მოსული ადამიანი, კაციც და ქალიც, ერთნაირად დაღლილია და ჯერ უნდა ივახშმოს, დაისვენოს და მერე გააკეთოს სახლის საქმე. და თუკი კაცს შეუძლია სამსახურის მერე სახლში არაფერი აკეთოს, ქალსაც უნდა შეეძლოს ასე.

14. ის, ვინც ფიქრობს, რომ ყველა ადამიანმა უნდა იმუშავოს და იშრომოს.

15. ის, ვინ ფიქრობს, რომ ყველა ადამიანს აქვს უფლება საკუთარი თავის რეალიზება მოახდინოს იმ სფეროში, სადაც მას სურს და გამოსდის და ამაში მიიღოს ანაზღაურება.

16. ის, ვინც ფიქრობს, რომ უფროსი, რომელიც ფეხმძიმე ქალს არ აიყვანს სამსახურში იმიტომ, რომ მერე მისი დეკრეტულ შვებულებაში გაშვება მოუწევს, ღორია.

17. ის, ვინც ფიქრობს, რომ ქალი არ უნდა გააუპატიურო.

18. ის, ვინც ფიქრობს, რომ უცნობი (ან ნაცნობი) ქალი ქუჩაში არ უნდა შეავიწროვო.

19. ის, ვინც ფიქრობს, რომ დაუშვებელია სექსუალური ძალადობა.

20. ის, ვინც ფიქრობს, რომ ყველას აქვს გართობის და ბედნიერების უფლება.

21. ის, ვინც მიიჩნევს, რომ ცოლობა ერთ-ერთი ყველაზე რთული საქმეა და მოიცავს შემდეგ პროფესიებს: 1. პროფესიონალ ფსიქოლოგობას, 2. მეძავობას, 3. ძიძობას, 4. დაწყებითი კლასების მასწავლებლობას, 5. დამლაგებლობას, 6. მრეცხავობას, 7. ჭურჭლის მრეცხავობას, 8. ლოჯისტიკის მენეჯერობას, 9. მზარეულობას, 10. ხანდახან – მკერავობას, 11. ინტერიერის დიზაინერობას… – რამდენს უხდიან ამ პროფესიის წარმომადგენლებს თვეში?

ალბათ ხვდები, რომ ამ სიის გაგრძელება უსასრულოდ შეიძლება. ყოველ შემთხვევაში, მინდოდა, გამექრო მითები იმ არარსებული ქალის შესახებ, რომელიც ბიჭურად იცვამს და მოკლე ვარცხნილობას ატარებს, იგინება, იფურთხება, ყვირის და გაუგებარი უფლებების დაცვას მოითხოვს. :)

თუ უკვე წაიკითხე ეს ჩამონათვალი და აქედან უმეტესობას მაინც ეთანხმები, მაშინ გილოცავ, შენც ჩემსავით ფემინისტი ყოფილხარ.