kacebisaxlisdalageba

რა არის გენდერული თანასწორობა?

გენდერული თანასწორობა არის კონცეფცია, რომლის მიხედვითაც ყოველი ადამიანი თავისუფალია საკუთარი უნარების განვითარებაში და არჩევანის გაკეთებაში, მასზე არ მოქმედებს გენდერული როლების მიერ წამოყენებული შეზღუდვები. ქალთა და მამაკაცთა ქცევები, მისწრაფებები და სურვილები სრულიად თანასწორად განიხილება. უფრო მარტივად და მოკლედ რომ ჩამოვაყალიბოთ, გენდერული თანასწორობაა სქესთა თანასწორობა ანუ თანაბარი უფლებები და შესაძლებლობები ორივე სქესისთვის.

რაში მდგომარეობს პრობლემა?

ჩვენს ქვეყანაში გენდერის აღქმა განსხვავებულია და არსებობს არც თუ სახარბიელო პრეცედენტები. რთულია, უკუაგდო ის პრინციპები და ტრადიციები, რომელიც დღეს განსაკუთრებით მტკივნეულია. მტკივნეულია, როცა შენ მიმართ არასწორ დამოკიდებულებას ამჟღავნებენ მხოლოდ იმის გამო, რომ ქალი ხარ.

კვლევის „კაცები და გენდერული ურთიერთობები საქართველოში“ მიზანი საქართველოში გენდერული თანასწორობის მიმართ მამაკაცების დამოკიდებულების და საოჯახო საქმეებში მათი ჩართულობის გამოვლენა იყო. გამოკითხვა იყო ანონიმური, რაც მისი სანდოობის ხარისხს კიდევ უფრო ზრდის. გთავაზობთ “გაეროს მოსახლეობის ფონდის” დაფინანსებით განხორციელებული კვლევის შედეგებს, რომელიც ამ სამი ძირითადი დებულების მიხედვით განხორციელდა:

ბავშვების მოვლა ძირითადად დედების მოვალეობაა.

View Results

Loading ... Loading ...

ოჯახში გადამწყვეტი სიტყვა მამაკაცს ეკუთვნის

View Results

Loading ... Loading ...

ქალმა უნდა მოითმინოს სიტყვიერი შეურაცხყოფა და ძალადობა, რათა შეინარჩუნოს ოჯახი

View Results

Loading ... Loading ...

ლოიალურად განწყობილთა ჯგუფში მოხვდა ყველა ის ადამიანი, რომელმაც სამივე კითხვაზე უარყოფითი პასუხი გასცა და სამწუხაროდ მათი რაოდენობა მხოლოდ 3,7 %-ს შეადგენდა. რეზისტენტულები, ანუ უარყოფითად განწყობილთა ჯგუფი ამ კითხვებზე დადებითი პასუხებით გამოვლინდა და მათი  პროცენტული მაჩვენებელი 45,5%-ს შეადგენს. ოპორტუნისტების ანუ იმ ადამიანთა ჯგუფის, რომლებიც რაღაც საკითხში ეთანხმებიან ზემოთ მოცემულ დებულებებს და რაღაც საკითხში არა, რაოდენობა 50,8%-ს შეადგენს.

გენდერული სიბრმავე

წლები გადის, თაობები იცვლებიან. თუმცა ამ გამოკვლევების მიხედვით მენტალობა და არასწორი სტერეოტიპები უცვლელი რჩება. გენდერული თანასწორობა ასოცირდება ფემინიზმთან, ფემინიზმი პრობლემად განიხილავს დისკრიმინაციას და ექსპლოატაციას სქესის და სექსუალური ორიენტაციის ნიშნით და არა მამაკაცს, როგორც ეს მოსახლეობის უდიდეს ნაწილს ჰგონია.

თვითონ ფაქტი და გამოკითხვის პასუხები  აღმაშფოთებელია. ყველაზე გულდასაწყვეტი, რაც ამ გამოკითხვის მიხედვით გამოვლინდა: ქალბატონების დამოკიდებულება ოჯახის პატრიარქალური წყობილების მიმართ. არაფრის შეცვლას ვცდილობთ ე.ი ვაღიარებთ კაცების ძალაუფლებას. დარწმუნებული ვართ, რომ მხოლოდ ჩვენი საქმეა:

  • ბავშვებზე ზრუნვა
  • საყიდლებზე სიარული
  • სადილის მომზადება და სხვა წვრილმანი (მაგრამ საკმაოდ დამღლელი) საოჯახო საქმეები
  • ამ ყველაფერთან ერთად ხშირ შემთხვევაში სამსახურის შეთავსებაც გვიწევს. ფაქტობრივად მთელი დღე განუწყვეტელ შრომაში ვართ.

მიჩნდება კითხვა: რატომ? ნუთუ არ შეიძლება სხვაგვარად? მთავარია თვალები გავახილოთ, დავინახოთ პრობლემა და მისი გადაჭრის გზებზეც ვიზრუნოთ. ვირწმუნოთ ჩვენი სიძლიერე, მოვინდომოთ, მოვთხოვოთ ჩვენს მეუღლეებს გენდერული ბალანსის დაცვა. გავაგებინოთ, რომ მასაც შეუძლია (უფრო მეტიც მისი მოვალეობაა):

  • წაიყვანოს და მოიყვანოს ბავშები ბაღში, სკოლაში ან სხვადასხვა წრეებზე
  • ბავშებს წაუკითხოს წიგნები ან ესაუბროს სხვადასხვა თემებზე
  • მოიმზადოს საუზმე და გარეცხოს საკუთარი ჭურჭელი
  • გააუთოოს საკუთარი შარვალი ან პერანგი
  • გაასწოროს საწოლი
  • ჩართოს სარეცხი მანქანა
  • დაალაგოს საკუთარი გარდერობი
  • დაალაგოს აბაზანა შხაპის მიღების შემდეგ.

ამ პუნქტების ჩამოთვლა ძალიან დიდ დროს წაიღებს. შეგიძლიათ შეავსოთ საკუთარი მოსაზრებებითაც. მოვინდომოთ, რომ იყოს ჩვენს ოჯახში თანაბარი უფლებები და გენდერული თანასწორობა. ვაგრძნობინოთ კაცებს, რომ მათ ეს შეუძლიათ. ასე უფრო მარტივი, სასიამოვნო და იოლია ცხოვრება.

თავად ცხრა წლიანი ოჯახური თანაცხოვრების განმავლობაში ბევრ პრობლემას გადავაწყდი ამ მხრივ. მეუღლესთან ხშირი კამათი და უსიამოვნებაც ჩვეული მოვლენა იყო. ვერ ხვდებოდა რატომ უნდა გაეკეთებინა თავად, როცა ეს მეც მშვენივრად შემეძლო, ამიტომ მუდამ საპირისპიროს ვუმტკიცებდი მანამ, სანამ არ მიხვდა, რომ მთავარი შესაძლებლობები კი არა ურთიერთგაგება, მოვალეობების თანაბრად გადანაწილება და გენდერული ბალანსის დაცვაა.

ნუ მისცემ საზოგადოებრივ დოგმებს საშუალებას განსაზღვროს შენი ცხოვრების წესი. იცხოვრე ისე, როგორც გსურს, გააკეთე ის, რისი გაკეთებაც გინდა და დაიცავი შენი უფლებები!